разам з сябрамі і аднакласнікамі ў паход!

Адзін з лепшых спосабаў актыўна правесці час летам – гэта адправіцца разам з сябрамі і аднакласнікамі ў паход. Менавіта так паступілі будучыя шасцікласнікі, арганізаваўшы са сваім класным кіраўніком Ільяшэвіч А.М. і бацькамі двухдзённы паход на возера Паперня ў пачатку ліпеня.
Група турыстаў размясцілася лагерам на беразе возера. Хлопцы выдатна папрактыкаваліся ва ўстаноўцы палатак, падрыхтоўцы дроў, распальванні агню. Паходная кухня і сталовая размяшчаліся пад спецыяльным шатром. Нашы турысты адказна падышлі да арганізацыі свайго харчавання – меню цалкам адпавядала апетыту, які разгуляўся на адкрытым паветры.
Рухомыя гульні з мячом, настольныя гульні,  дзяжурства па лагеры, размовы і песні ля вогнішча, неабмежаваныя магчымасці купання – усё гэта дазваляе па-сапраўднаму адчуць плячо сябра і дапамагае згуртавацца класу.
Ці спадабаўся рабятам паход? Іх жаданне адправіцца на возера яшчэ раз усім класам да канца лета з’яўляецца адказам на гэтае пытанне.