Раённая ваенна-патрыятычная гульня «Арляня-2022»

Рэспубліканская ваенна-патрыятычная гульня «Арляня» праводзіцца Міністэрствам адукацыі сумесна з Міністэрствам абароны, грамадскім аб’яднаннем «Беларускі рэспубліканскі саюз моладзі». Мэтай правядзення гульні з’яўляецца ўдасканаленне сістэмы патрыятычнага выхавання і ўзроўню дапрызыўнай падрыхтоўкі навучэнцаў, а таксама садзейнічанне станаўленню актыўнай грамадзянскай пазіцыі моладзі.

У рамках мерапрыемстваў Года гістарычнай памяці 13-14 мая вучні 9-11 класаў Ліноўскай школы прынялі актыўны ўдзел у традыцыйных раённых ваенна-патрыятычных спаборніцтвах «Арляня». Месцам правядзення традыцыйна стала пляцоўка на базе ДУДА «Цэнтр дзіцяча-юнацкага турызму і краязнаўства» ў Рудніках. Гэта была выдатная магчымасць скінуць напружанне навучальнага года перад надыходзячымі экзаменамі. Аднак удзельнікаў гульні  чакаў не толькі адпачынак на прыродзе, але і шматлікія выпрабаванні. Па-першае, неабходна было паказаць свае ўменні па арганізацыі турыстычнага быту — добраўпарадкаванні свайго лагера, прыгатаванні ежы і гэтак далей. Потым каманды дэманстравалі хатнія загатоўкі: расказвалі пра сябе, выконвалі патрыятычныя песні. Падчас сілавых спаборніцтваў «арляняты» ўдзельнічалі ў страявой і фізічнай падрыхтоўцы, стральбе з пнеўматычных вінтовак, пажарнай эстафеце з баявым разгортваннем і паказвалі веды медыцынскага характару. Па кожным відзе падводзіліся прамежкавыя вынікі.