тыдзень замежных моў

З 3 па 7 сакавіка ў Ліноўскай школе  прайшоў тыдзень замежных моў.

Мэтай дадзенага мерапрыемства было павышэнне цікавасці навучэнцаў да вывучэння замежнай мовы, а таксама знаёмства з  культурай, звычаямі і традыцыямі краіны вывучаемай мовы.

Мерапрыемства было арганізавана ў  форме інтэрактыўнай  гульні  “Прыгоды сонечнага праменьчыка”. Сонечны праменьчык і вучні “зазіралі”  у розныя акенцы, дзе іх чакалі неверагодныя сустрэчы і заданні.  За актыўны ўдзел і добрыя адказы дзеці атрымлівалі жэтоны.

Так, у  панядзелак,  вучні з задавальненнем наведалі інфармацыйнае акенца, дзе пазнаёміліся з цікавымі фактамі аб Германіі, яе знакамітымі асобамі і традыцыямі. У пачатку дня пачала дзейнічаць святочная пошта.

У аўторак запрасіла  да сябе ў госці музычнае акенца. Дзецям было  прапанавана паўдзельнічаць  ў конкурсе песень і фестывалі караоке на нямецкай мове. Асаблівую цікавасць выклікалі танцы з казачнымі героямі і выстава-парад нямецкіх кампазітараў. Шмат задавальнення прынесла інтэрактыўная гульня “Знайдзі пару”.

Не менш актуальным было і літаратурнае акенца. Попытам карыстаўся фестываль крыжаванак і рэбусаў, у якім удзельнічаў кожны клас. Зацікавіла юных літаратараў гульня-пазл “Аўтары і іх творы”, не менш прываблівымі былі гульні  “АВС” і “У пошуках казачнага героя” . На першым паверсе была арганізавана пазнавальная выстава “Вуліца славутасцей”,  на другім паверсе дзейнічала “Пляцоўка казак братоў Грым.”

У чацвер школьных сяброў сабрала  пазнавальнае акенца. Займальныя віктарыны, турніры, пазнавальныя  гульні “Што? Дзе? Калі?”, “Разумнікі і разумніцы”, “Свая гульня”, квэст “Школьнае меню” адкрылі свае дзверы перад вучнямі.

У пятніцу сонечны праменьчык завітаў у забаўляльнае акенца. Дзеці з захапленнем удзельнічалі ў спаборніцтвах “Знайдзі прыказку” , «Лічым па-нямецку», а таксама ў турніры “Самая хуткая скорагаворка”.  Да спадобы прыйшоўся парад нямецкіх мультфільмаў. Шматлікія гульні і конкурсы чакалі кожнага вучня.

Самым актыўным вучням была прапанавана бяспройгрышная латарэя.  Пераможцы былі ўзнагароджаны дыпломамі і падарункамі, усе ўдзельнікі  “Прыгод сонечнага праменьчыка”  атрымалі салодкія пачастункі.