ТЫДЗЕНЬ БЕЛАРУСКАЙ МОВЫ І ЛІТАРАТУРЫ

З 7 па 13 лютага ў школе прайшоў Тыдзень беларускай мовы і літаратуры пад агульным дэвізам “Рускай мове дай разгрузку – размаўляй па-беларуску!” Дэвіз панядзелка: “Мова родная – мова модная!” У гэты дзень была наладжана выстава ў бібліятэцы “Пісьменнікам-юбілярам прысвячаецца”, праведзены інфармацыйныя гадзіны “Пра Беларусь і беларускую мову”. На перапынках дзеці склалі сэрца любімых беларускіх слоў (КТС “Жыві ў сэрцы маім, матуліна мова”), праведзены гульнявы перапынак “Знаўцы роднай мовы, ці назаві слова па-беларуску”.

Дэвіз аўторка – “З любоўю да роднага слова”. У час акцыі “Далучы сваю далонь” вучні мелі магчымасць выказаць пажаданні сваёй краіне, беларусам. На перапынках дэманстраваліся відэаролікі “Твая зямля, твая Радзіма названа светла – Беларусь!”, разгадвалі рэбусы і крыжаванкі.

Дэвіз серады – “Я – беларус, я нарадзіўся на гэтай казачнай зямлі”. Да гэтага дня была наладжана выстава “Дызайн па-беларуску”, у час якой былі прадэманстраваны тканыя ручнікі, самаробныя лялькі ў беларускіх нацыянальных строях Жвалікоўскай Н.А. На перапынках дзеці разам з Бяскроўнай Л.А., настаўніцай беларускай мовы і літаратуры, гулялі ў беларускія гульні, разыгрывалі бяспройгрышую латарэю беларускіх афарызмаў.

Дэвіз чацвярга – “Дала мне маці гэту мову!” У час гульнявых перапынкаў дзецям прапанавана было завяршыць прыказку, рашаць лінгвістычныя задачы. Праведзены класныя гадзіны: вусны часопіс “Жыву ў Беларусі і тым ганаруся”, турнір “Мая сінявокая Беларусь”.

Дэвіз пятніцы – “Сэрцам роднага слова краніся”. У гэты дзень была наладжана зона рэлаксацыі “Беларусь у фарбах”, на перапынках вучні глядзелі мультфільмы па-беларуску, разгадвалі загадкі.

Дэвіз суботы – “Хто не любіць роднай мовы, той любіць толькі сам сябе”. Для вучняў 5-8 класаў была праведзена квэст-гульня “Збяры Беларусь у сваім сэрцы”.